തിഥികള്‍ ഫലങ്ങള്‍ അധിഷ്ഠാനദേവതമാര്‍
തിഥികളെപ്പറ്റിയും ഫലങ്ങളെക്കുറിച്ചും അതിന്‍റെ അധിഷ്ഠാനദേവതമാരെപ്പറ്റിയും പ്രതിപാദിക്കുന്നത് ശ്രീവരാഹപുരാണത്തിലാണ്. തിഥികള്‍ സൃഷ്ടിക്കപ്പെടാന്‍ കാരണഭൂതനായത് ശ്രീമഹാദേവനാണ്. അദ്ദേഹത്തിന്‍റെ നിര്‍ദ്ദേശപ്രകാരം മഹാതപ മഹര്‍ഷിയാണ് പ്രജാബലമഹാരാജാവിന് തിഥികളെപ്പറ്റി ആദ്യം പറഞ്ഞുകൊടുക്കുന്നത്. തിഥികളില്‍ പലതും വളരെ അപൂര്‍വ്വമായ ഫലങ്ങള്‍ നല്‍കുന്നവയാണ്. ആ ദിവസങ്ങളില്‍ നടത്തുന്ന പൂജകള്‍, മന്ത്രോച്ചാരണങ്ങള്‍ എന്നിവയ്ക്ക് വളരെ വേഗമാണ് ഫലസിദ്ധിയുണ്ടാകുന്നത്. അതേപ്പറ്റി പറയുകയാണിവിടെ.
പ്രഥമ
അഗ്നിയുമായി ബന്ധപ്പെട്ട തിഥിയാണിത്. ബ്രഹ്മാവ് പ്രഥമതിഥിയിലാണ് തന്‍റെ ഹോമത്തില്‍ നിന്നും ആദ്യമായി അഗ്നിയെ സൃഷ്ടിച്ചത്. ഈ തിഥി അഗ്നിപൂജയ്ക്ക് നല്ല ദിവസമാണ്.
ദ്വിതീയ
ദ്വിതീയ തിഥിയില്‍ അശ്വനി ദേവന്മാരെ വേണം പൂജിക്കേണ്ടത്. അശ്വനിദേവന്മാര്‍ ദേവലോകത്തെ വൈദ്യന്മാരായി അറിയപ്പെടുന്നു. രോഗങ്ങള്‍ക്കും ദേഹാസ്വസ്ഥതകള്‍ക്കും പരിഹാരമായി അശ്വനിദേവസ്മരണയോടെ പൂജകളും വ്രതങ്ങളും നോല്‍ക്കുന്നത് നല്ലതാണ്.
ത്രിതീയ
രുദ്രപൂജയ്ക്ക് നല്ല തിഥിയാണിത്.ഈ തിഥിയില്‍ ശിവപൂജ ചെയ്താല്‍ മംഗളം ഭവിക്കുകയും ദമ്പതിമാര്‍ തമ്മില്‍ പിരിയാതെ കുടുംബഐക്യത്തോടെ, സന്തോഷത്തോടെ കഴിയും. ശിവന്‍ പാര്‍വ്വതിയെ പരിണയിച്ചത് ത്രിതീയതിഥിയിലാണ്. അതിനാല്‍ ഇത് ശുഭശകുനതിഥിയായി കരുതുന്നു.
ചതുര്‍ത്ഥി
ഗണേശപൂജയ്ക്ക് നല്ലതാണ് ഈ തിഥി. ഗണപതി പിറന്നത് ഈ തിഥിയിലാണ്. അതിനാലാണ് വിനായകചതുര്‍ത്ഥി പുണ്യദിനമായി മാറിയത്. ഈ ദിവസം വ്രതം അനുഷ്ഠിച്ച് എള്ളു ഭക്ഷിച്ചാല്‍ അതിശ്രേഷ്ഠമാണ്.
പഞ്ചമി
ഈ തിഥിയിലാണ് ബ്രഹ്മാവ് എല്ലാ സര്‍പ്പങ്ങളെയും പ്രത്യേകമായൊരു ലോകം സൃഷ്ടിച്ച് അവിടേയ്ക്ക് അയച്ചത്. ഇത് നാഗലോകം എന്നറിയപ്പെട്ടു. സര്‍പ്പപൂജയ്ക്ക് വിശേഷപ്പെട്ട ദിനമാണിത്. നാഗപഞ്ചമി വ്രതം പ്രശസ്തമാണ്. പഞ്ചമിതിഥിയില്‍ പുളിപ്പുള്ള ആഹാരം കഴിക്കരുത്. അന്ന് നാഗങ്ങള്‍ക്ക് നൂറും പാലും അഭിഷേകം നടത്തുക.
ഷഷ്ഠി
സുബ്രഹ്മണ്യപൂജയ്ക്ക് ഏറ്റവും നല്ല തിഥി. അന്ന് മുരുകപൂജ നടത്തിയാല്‍ ശാരീരികാരോഗ്യം, ദീര്‍ഘായുസ്സ് എന്നിവയുണ്ടാകും. അന്ന് പഴം മാത്രം ഭക്ഷിച്ച് അര്‍ച്ചനചെയ്ത് പൂജിച്ചാല്‍ എല്ലാവര്‍ക്കും ക്ഷേമം ഉണ്ടാകും. ഇതേപ്പറ്റിയുള്ള പഴമൊഴി ഇതാണ്. ചട്ടിയിലുണ്ടെങ്കില്‍ കോരികയില്‍ തരും. ഇവിടെ ചട്ടിയെന്നത് ഷഷ്ഠിയാണ്. അതായത് ഷഷ്ഠിയില്‍ ഉപവാസമിരുന്ന് മുരുകനെ പൂജിക്കുന്ന സ്ത്രീയുടെ ഗര്‍ഭപാത്രത്തില്‍ ഭ്രൂണം പിറവികൊണ്ട് കുഞ്ഞുജനിക്കുമെന്നാണര്‍ത്ഥം. ഷഷ്ഠി തിഥിയിലാണ് ബ്രഹ്മാവ് കാര്‍ത്തികേയനെ ദേവസേനാപതിയാക്കിയത്.
സപ്തമി
ആദിത്യപൂജയ്ക്ക് ഉത്തമതിഥിയാണിത്. ഇതിന്‍റെ അധിപനും സൂര്യനാണ്. രഥസപ്തമിയെന്നത് ശ്രേഷ്ഠമായ സൂര്യാപൂജാദിനമാണ്. സപ്താശ്വത്തേരിലാണല്ലോ സൂര്യന് എഴുന്നെള്ളുന്നത്. സൂര്യന് പായസനൈവൈദ്യമുണ്ടാക്കി അന്നേദിവസം പൂജിച്ചാല്‍ എല്ലാവിധത്തിലും സൂര്യന്‍റെ അനുഗ്രഹമുണ്ടാകും. അതുകൊണ്ടാണ് ഗ്രാമങ്ങളില്‍ ഞായറാഴ്ച(സൂര്യദിനം) പൊങ്കാലയിട്ട് പായസം നിവേദിക്കുന്നത്.
അഷ്ടമി
അഷ്ടമാതാക്കളുടെ ജന്മതിഥിയാണിത്. അഷ്ടമാതാക്കള്‍ ശത്രുനിഗ്രഹം നടത്തി ലോകത്തിന് സമാധാനം നല്‍കിയ ദിവസം. അന്ന് അഷ്ടമാതാക്കളെ പൂജിക്കുന്നത് ബഹുവിശേഷം. അഷ്ടമിതിഥിയിലാണ് അംബികാദേവി ശത്രുക്കളെ ജയിച്ച ദിവസം. മാത്രമല്ല അന്നാണ് ഭഗവാന്‍ ശ്രീകൃഷ്ണന്‍ രോഹിണി നക്ഷത്രത്തില്‍ ജനിച്ചതും നന്മയ്ക്കും ശ്രേയസ്സിനും വേണ്ടി ഗോപാലകവൃന്ദം ഗോകുലാഷ്ടമി പൂജ നടത്തിയതും.
നവമി
ഈ തിഥിയിലാണ് ഗായത്രി ദേവി വെട്രാസുരനെ വധിച്ച് പ്രപഞ്ചരക്ഷകയായത്. മാത്രമല്ല, ഭഗവാന്‍ ശ്രീരാമന്‍ ജനിച്ചതും നവമി തിഥിയിലാണ്. നവരാത്രികാലത്ത് നവമിതിഥിയിലെ സരസ്വതിപൂജ, ആയുധപൂജ എന്നിവയും ബഹുവിശേഷമാണ്.
ദശമി
ദശമിതിഥിയില്‍ തൈര് മാത്രം ഭക്ഷിച്ച് ബ്രഹ്മാവിനാല്‍ സൃഷ്ടിക്കപ്പെട്ട പത്തുദേവിമാരെ പൂജിക്കണം. ഈ തിഥിയിലാണ് ദേവി മഹിഷാസുരനെ നിഗ്രഹിച്ചതും. അതുകൊണ്ടാണ് അന്നേദിവസം വിജയദശമിയായി ആഘോഷപൂര്‍വ്വം കൊണ്ടാടുന്നത്.
ബ്രഹ്മാവിനാല്‍ സൃഷ്ടിക്കപ്പെട്ട പത്തുദേവിമാരെയും അദ്ദേഹം പത്തുദേവന്മാര്‍ക്ക് വിവാഹം കഴിച്ചുകൊടുത്തു. പൂര്‍വ്വയെ ഇന്ദ്രനും പശ്ചിമയെ വരുണനും ഉത്തരയെ കുബേരനും ദക്ഷിണയെ യമനും ആഗ്നേയയെ അഗ്നിക്കും നൈരുകിയെ നിര്യതിക്കും ഈശാനയെ ശങ്കരനും വായപ്യയെ വായുവിനും ഊര്‍ദ്ധ്വത്തെ സുമായമുക്കിനും അദ്വത്തെ ശേഷനാഗത്തിനുമാണ് ബ്രഹ്മാവ് വിവാഹം കഴിച്ചുകൊടുത്തത്. ഈ പത്തുദേവിമാരും പത്തുദിക്കുകളെയാണ് പ്രതിനിധീകരിക്കുന്നത്.
ഏകാദശി
ഈ തിഥിയിലാണ് ബ്രഹ്മാവ് കുബേരനെ സൃഷ്ടിച്ചത്. അദ്ദേഹത്തിന്‍റെ ആജ്ഞപ്രകാരമാണ് കുബേരന്‍ ധനത്തിന്‍റെ അധിപതിയാകുന്നതും. ഏകാദശിതിഥി നാളില്‍ പഴം മാത്രം ഭക്ഷിച്ച് കുബേരനെ പൂജിച്ചാല്‍ സദ്ഫലം ലഭിക്കും. വിഷ്ണുപൂജയ്ക്ക് ഏറ്റവും യോജിച്ച തിഥിയും ഏകാദശിയാണ്. അന്ന് വ്രതം അനുഷ്ഠിക്കുന്നത് ഏറെ വിശേഷമാണ്.
ദ്വാദശി
വായുദേവന്‍റെ അപേക്ഷ സ്വീകരിച്ച് ഭഗവാന്‍ നാരായണന്‍ വിഷ്ണുവെന്ന പേര് സ്വീകരിച്ച തിഥിയാണിത്. ഭഗവാന്‍ വിഷ്ണുവായി പേര് സ്വീകരിച്ചതില്‍ പിന്നീടാണ് നാല് തൃക്കൈകളില്‍ ശംഖ്, ചക്രം, ഗദ, സുദര്‍ശനചക്രം എന്നിവ അണിഞ്ഞതും വൈജയന്തിമാല ചാര്‍ത്തിയതും. കൂടാതെ ദ്വാദശിയിലാണ് മഹാലക്ഷ്മി മഹാവിഷ്ണുവിന്‍റെ പത്നീപദം അലങ്കരിച്ചത്. അന്നേദിവസം ബ്രാഹ്മണര്‍ക്ക് നെയ്യ്, തേന്‍ എന്നിവ ദാനം ചെയ്യുന്നത് നല്ലതാണ്.
ത്രയോദശി
ഈ തിഥിയില്‍ വേണം ധര്‍മ്മദേവതയെ പ്രീതിപ്പെടുത്തേണ്ടത്. ഓരോ വ്യക്തിക്കും ധര്‍മ്മദേവത, കുടുംബദേവത എന്നിവയുണ്ട്. അത് ഏതെന്ന് കണ്ടെത്തി ത്രയോദശിതിഥിയില്‍ പൂജിക്കണമെന്നാണ് വിശ്വാസം. ത്രയോദശിയിലാണ് ബ്രഹ്മാവ് ധര്‍മ്മദേവതയെ പൂജിച്ചത്.
ചതുര്‍ദശി
രുദ്രപൂജയ്ക്ക് നല്ല തിഥിയാണിത്. അന്ന് ഉപവാസമിരുന്ന് ശിവപുരാണങ്ങള്‍, കീര്‍ത്തനങ്ങള്‍ ഇവ പാരായണം ചെയ്യുന്നതും കേള്‍ക്കുന്നതും പാപവിമോചനം നല്‍കും.
അമാവാസി
എല്ലാ ജീവജാലങ്ങള്‍ക്കും പിതൃസ്ഥാനങ്ങള്‍ കല്‍പ്പിക്കപ്പെട്ടിട്ടുണ്ട്. അമാവാസി തിഥിയില്‍ തര്‍പ്പണം ചെയ്യുന്നതിലൂടെ പിതൃക്കള്‍ സംതൃപ്തമാകും. അതിലൂടെ മനസ്സിന്‍റെ പ്രാര്‍ത്ഥനകള്‍ സാക്ഷാത്ക്കരിക്കപ്പെടും. ബ്രഹ്മാവിനാല്‍ സൃഷ്ടിക്കപ്പെട്ട തന്മന്ത്രങ്ങളെ ആദരിച്ച് ഫലപ്രാപ്തി കൈവരിക്കുന്നതും അമാവാസിയിലാണ്.
പൗര്‍ണ്ണമി അഥവാ വെളുത്തവാവ്
ചന്ദ്രന്‍റെ ഉത്തമതിഥിയാണിത്. ചന്ദ്രന്‍ തന്‍റെ പൂര്‍ണ്ണപരിവേഷം, ഊര്‍ജ്ജം, ലക്ഷ്യം, ഇവ കൈവരിക്കുന്നത് പൗര്‍ണ്ണമി തിഥിയിലാണ്. ചന്ദ്രന്‍ നക്ഷത്രഗണത്തില്‍പ്പെട്ട ഇരുപത്തേഴ് ദക്ഷപുത്രന്മാരെ വിവാഹം കഴിച്ചെങ്കിലും രോഹിണിയോടായിരുന്നു കൂടുതല്‍ ഇഷ്ടം. മറ്റ് പുത്രിമാര്‍ ഇതേപ്പറ്റി ദക്ഷനോട് പരാതി പറഞ്ഞപ്പോള്‍ ചന്ദ്രന്‍റെ പ്രഭാവം, കലകള്‍ അനുദിനം തേഞ്ഞില്ലാതാകട്ടെയെന്ന് ശപിച്ചു. ഒടുവില്‍ ശാപമോക്ഷത്തിന്‍റെ ഫലമായി കലകള്‍ വളരാന്‍ ശിവന്‍ അനുവദിക്കുകയും അതില്‍ അവസാനത്തെ കല അദ്ദേഹം തന്‍റെ മൗലിയില്‍ അണിയുകയും ചെയ്തു. ചന്ദ്രപൂജയ്ക്ക് നല്ല ദിവസമാണ് പൗര്‍ണ്ണമിതിഥി.
കറുത്തപക്ഷത്തിലേയും വെളുത്ത പക്ഷത്തിലേയും തിഥികള്‍ മേല്‍പ്പറഞ്ഞ പ്രകാരം ദേവതാരാധനയ്ക്ക് സ്വീകരിക്കാം. അമാവാസിയും പൗര്‍ണ്ണമിയും അതില്‍നിന്ന് ഒറ്റപ്പെട്ട തിഥികളാണ്. ശ്രീവരാഹപുരാണത്തിലാണ് ഇതേക്കുറിച്ചുള്ള പ്രതിപാദനങ്ങള്‍.
എന്‍.ടി. സതീഷ്