ഇന്നു സന്ധ്യക്ക് നിങ്ങളുടെ വീട്ടിൽ ഉറപ്പായും ചെയ്യേണ്ട ആചാരം; ദുരിതങ്ങളെ അകറ്റി ഐശ്വര്യവും സമൃദ്ധിയും നിറയും
കേരളത്തിന്റെ സാംസ്കാരിക പാരമ്പര്യത്തിൽ ഇന്നും ജീവിച്ചിരിക്കുന്ന പ്രധാന ആചാരങ്ങളിലൊന്നാണ് കർക്കടകസംക്രാന്തി. പ്രത്യേകിച്ച് തെക്കൻ മലബാർ മേഖലകളിൽ ഏറെ പ്രാധാന്യത്തോടെയാണ് ഈ ആചാരം നടത്താറുള്ളത്. വീടിനും മനസ്സിനും ശുദ്ധി വരുത്തി ഐശ്വര്യത്തെ സ്വാഗതം ചെയ്യുന്നതിന്റെ പ്രതീകമായാണ് കണക്കാക്കപ്പെടുന്നത്.
മിഥുനമാസത്തിന്റെ അവസാന ദിനമായ സംക്രാന്തി സന്ധ്യയിലാണ് പ്രധാന ചടങ്ങുകൾ നടക്കുന്നത്. ആഘോഷത്തിന് മുന്നോടിയായി വീടും പരിസരവും വൃത്തിയാക്കി പശുവിൻ ചാണകവെള്ളം തളിച്ച് ശുദ്ധീകരിക്കുന്നു. തുടർന്ന് കീറിയ പഴയ മുറത്തിൽ വെള്ള, കറുപ്പ്, മഞ്ഞ നിറങ്ങളിലുള്ള മൂന്ന് ചോറുരുളകൾ ഒരുക്കി, എരിഞ്ഞി ഇല, കൂവയില, മെച്ചിങ്ങ, കുറ്റിച്ചൂല്, മൈലാഞ്ചി തുടങ്ങിയവയും ചേർത്ത് മൂന്ന് തിരികൾ തെളിയിക്കുന്നു.
ഈ മുറം കൈയിൽ പിടിച്ച് വീട്ടിലെ എല്ലാ മുറികളിലും കയറിയിറങ്ങിക്കൊണ്ട് "പൊട്ടി പോ... പോ... ശ്രീപോതിയും മക്കളും വാ... വാ..." എന്ന് ഉച്ചത്തിൽ വിളിച്ചുപറയുന്നതാണ് ചടങ്ങിലെ പ്രധാന ഭാഗം. തുടർന്ന് വീടിന് ചുറ്റും മൂന്ന് പ്രാവശ്യം വലംവയ്ക്കുകയും വാഴപ്പിണ്ടികളും മടലുകളും നിലത്ത് അടിച്ച് ശബ്ദമുണ്ടാക്കിക്കൊണ്ട് കുട്ടികൾ പിന്നാലെ സഞ്ചരിക്കുകയും ചെയ്യുന്നു. ചടങ്ങ് പൂർത്തിയായ ശേഷം മുറവും അതിലെ സാധനങ്ങളും ആളൊഴിഞ്ഞ സ്ഥലത്ത് ഉപേക്ഷിക്കുന്നു.
ശേഷം ചടങ്ങ് നടത്തിയ സ്ത്രീ എണ്ണതേച്ച് കുളത്തിൽ കുളിച്ച് ശുദ്ധീകരണ ക്രിയ നിർവഹിക്കുന്നു. ഭൂമീദേവിക്ക് എണ്ണ സമർപ്പിക്കുന്നതും ആചാരത്തിന്റെ ഭാഗമാണ്. ചേട്ടയെ പുറത്താക്കി ശ്രീദേവിയെയോ പാർവതിയെയോ വീട്ടിലേക്ക് സ്വാഗതം ചെയ്യുക എന്ന സങ്കൽപമാണ് ഈ ചടങ്ങിന് പിന്നിലുള്ളത്. മനസ്സിലെ ദുഷ്ചിന്തകളും ദുഷ്പ്രേരണകളും അകറ്റി ആത്മീയ ശുദ്ധി കൈവരിക്കണമെന്ന സന്ദേശവും ഇതിലൂടെ നൽകുന്നു.
കർക്കടകമാസം ഒന്നാം തീയതി പുലർച്ചെ ഗൃഹനായിക കുളിച്ച് പുതുവസ്ത്രം ധരിച്ച് ദശപുഷ്പങ്ങൾ ചൂടി പൂജാമുറിയിൽ ഏഴുതിരിയുള്ള നിലവിളക്ക് തെളിയിക്കുന്നു. വെള്ളം നിറച്ച ഓട്ടുകിണ്ടിയും ദശപുഷ്പങ്ങളും വാൽക്കണ്ണാടിയും പൂജയ്ക്കായി ഒരുക്കും. കറുക, കയ്യോന്നി, പൂവാംകുരുന്നില, മുക്കുറ്റി, ചെറൂള, മുയൽചെവിയൻ, കൃഷ്ണക്രാന്തി, നിലപ്പന, തിരുതാളി, ഉഴിഞ്ഞ എന്നിവയാണ് ദശപുഷ്പങ്ങൾ. കുടുംബത്തിൽ സമാധാനവും ഐശ്വര്യവും നിറയട്ടെയെന്ന പ്രാർഥനയോടെയാണ് ഈ ചടങ്ങുകൾ നടക്കുന്നത്.
ഹിന്ദു വിശ്വാസപ്രകാരം കർക്കടകമാസം അതിപുണ്യമാസമാണ്. രാമായണമാസമായും ഈ മാസം ആചരിക്കപ്പെടുന്നു. ക്ഷേത്രങ്ങളിൽ പ്രത്യേക പൂജകളും രാമായണപാരായണവും നടക്കുന്നു. ശ്രീരാമൻ, ഭരതൻ, ലക്ഷ്മണൻ, ശത്രുഘ്നൻ എന്നിവരുടെ പ്രതിഷ്ഠകളുള്ള നാലമ്പലങ്ങൾ ഒരേ ദിവസം ദർശിക്കുന്നത് വിശേഷപുണ്യമായും വിശ്വസിക്കപ്പെടുന്നു.
മിഥുനമാസത്തിലെ ദുരിതങ്ങൾ പിന്നിട്ട് സമൃദ്ധിയുടെ ചിങ്ങമാസത്തെയും തിരുവോണത്തെയും വരവേൽക്കുന്ന ഒരു ആത്മീയ തുടക്കമായാണ് കർക്കടകസംക്രാന്തിയെ കേരളീയർ കാണുന്നത്. ഈ ദിനം മുതൽ ഓണത്തിനായുള്ള ഒരുക്കങ്ങൾക്കും സംസ്ഥാനത്ത് തുടക്കമാകുന്നു.