പൂജയ്ക്കായുള്ള ആവണപ്പലക
പൂജയ്ക്കായി, പൂജാരിമാര്‍ ഉപവിഷ്ടരാകുന്ന ഇരിപ്പിടമാണ് ആവണപ്പലക. കൂര്‍മ്മപീഠിക എന്ന മറ്റൊരു പേര് കൂടി ആവണപ്പലകയ്ക്കുണ്ട്. തേന്‍വരിക്കപ്ലാവിന്‍തടിയില്‍ നിര്‍മ്മിക്കുന്ന ആവണപ്പലകയ്ക്ക് പ്രപഞ്ചത്തിന്‍റെ ആകൃതിയാണുള്ളത്. ബ്രഹ്മാണ്ഡത്തിലെ സകലതത്വങ്ങളും ഉള്‍പ്പെട്ടതും, സര്‍വ്വസൃഷ്ടി സങ്കീര്‍ണ്ണതകള്‍ നിറഞ്ഞതുമായ വിധിയാണത്രേ ആവണപ്പലകയിലുള്ളത്. ആവണപ്പലകയുടെ വിധിപ്രകാരമുള്ള കണക്ക് വൈദികകാല വിശ്വകര്‍മ്മാക്കളുടെ ജീവിതവുമായി ബന്ധപ്പെട്ടിരിക്കുന്നു. ആവണപ്പലകയെ ബഹുമാനിക്കാത്ത പൂജാരിമാര്‍ ചെയ്യുന്ന പൂജയ്ക്ക് പൂര്‍ണ്ണത ഉണ്ടാവുകയില്ലത്രേ.
പൂജയ്ക്കായി, പൂജാരിമാര്‍ ഉപവിഷ്ടരാകുന്ന ഇരിപ്പിടമാണ് ആവണപ്പലക. കൂര്‍മ്മപീഠിക എന്ന മറ്റൊരു പേര് കൂടി ആവണപ്പലകയ്ക്കുണ്ട്. തേന്‍വരിക്കപ്ലാവിന്‍തടിയില്‍ നിര്‍മ്മിക്കുന്ന ആവണപ്പലകയ്ക്ക് പ്രപഞ്ചത്തിന്‍റെ ആകൃതിയാണുള്ളത്. ബ്രഹ്മാണ്ഡത്തിലെ സകലതത്വങ്ങളും ഉള്‍പ്പെട്ടതും, സര്‍വ്വസൃഷ്ടി സങ്കീര്‍ണ്ണതകള്‍ നിറഞ്ഞതുമായ വിധിയാണത്രേ ആവണപ്പലകയിലുള്ളത്. ആവണപ്പലകയുടെ വിധിപ്രകാരമുള്ള കണക്ക് വൈദികകാല വിശ്വകര്‍മ്മാക്കളുടെ ജീവിതവുമായി ബന്ധപ്പെട്ടിരിക്കുന്നു.
സഹനത്തിന്‍റെ പ്രതീകമായ ആമയുടെ ആകൃതിയാണ് ആവണപ്പലകയ്ക്കുള്ളത്. ആവണപ്പലകയുടെ നിര്‍മ്മാണത്തിനായി ഉപയോഗിച്ചിരിക്കുന്ന കണക്ക് പഞ്ചയോനി കണക്കാണ്. കൃത്യമായ ഉയരവും വീതിയും നീളവും ആവണപ്പലകയുടെ ആകര്‍ഷണ ശക്തിയെ ബലപ്പെടുത്തുന്നതാണത്രേ. എത്ര കഠിനമേറിയ മന്ത്രവും ആവണപ്പലകയിലിരുന്ന് ജപിച്ചാല്‍ വേഗം ഹൃദിസ്ഥമാവുകയും, മന്ത്രദേവത പ്രത്യക്ഷപ്പെടുകയും ചെയ്യും. ആ കണ്ടെത്തലില്‍ നിന്നുമാണ് പൂജയ്ക്കും, പൗരോഹിത്യവൃത്തിക്കും ആവണപ്പലക ഒഴിച്ചുകൂടാന്‍ പറ്റാത്തതായി മാറിയത്.
ബ്രഹ്മാണ്ഡതത്വം ഉള്‍പ്പെടുത്തി തയ്യാറാക്കുന്ന ആവണപ്പലകയുടെ മദ്ധ്യഭാഗത്തില്‍ വിശ്വകര്‍മ്മാവും, അഞ്ച് വശങ്ങളില്‍ അതായത് ആമയുടെ ശിരസ്സ് പോലെയുള്ള ഭാഗത്ത് പ്രണവം എന്ന തത്വവും ഉള്‍പ്പെടുന്നു. ഋക്ക്, യജുസ്സ്, സാമം, അഥര്‍വ്വം എന്നീ നാല് വേദങ്ങളും ആമയുടെ പാദങ്ങളെ പ്രതിനിധാനം ചെയ്യുന്നു. അതായത് 4 വേദങ്ങളും കൂടി ഈ ബ്രഹ്മാണ്ഡത്തെ താങ്ങി നിര്‍ത്തുന്നു എന്ന് സങ്കല്‍പ്പം. അഥവാ ബ്രഹ്മാണ്ഡം ഈ നാലു വേദങ്ങളെയും ഉള്‍കക്കൊള്ളുന്ന പോലെയും ആകുന്നു. വിശ്വകര്‍മ്മാവില്‍ ഉള്‍പ്പെട്ട മുപ്പത്തിമുക്കോടി ദേവതകളും അമര്‍ത്ത്യരായി ഈ ആണവപ്പലകയില്‍ അധിവസിക്കുന്ന സമുന്നതമായ സങ്കല്‍പ്പമാണിത്.
10008 മന്ത്രങ്ങളും, പ്രണവ-ഋഗ്വാദി വേദങ്ങളും, സര്‍വ്വബീജങ്ങളും ഉള്‍പ്പെടുത്തിയിട്ടുള്ളതിനാല്‍ ആവണപ്പലകയില്‍ ഇരുന്ന് പൂജ ചെയ്യുകയോ, ഹോമം നടത്തുകയോ ചെയ്താല്‍ സാക്ഷാല്‍ പരാശക്തി പ്രത്യക്ഷയാകും എന്നതാണ് വിശ്വകര്‍മ്മാക്കളുടെ വിശ്വാസം.
സമര്‍ത്ഥനായ ഒരു മരയാചാരിക്ക്(മയബ്രഹ്മ പരമ്പര) ഇത്തരം ആവണപ്പലക വിധിപ്രകാരം തയ്യാറാക്കാനാവുകയുള്ളൂ. മേടമാസത്തിലെ ചിത്തിര നക്ഷത്രത്തില്‍ ആരംഭിച്ച് എല്ലാ മാസവും പൗര്‍ണ്ണമിയില്‍ പൂജ ചെയ്ത് ശക്തിവരുത്തി മീനമാസത്തില്‍ നിര്‍മ്മാണം പൂര്‍ത്തിയാക്കി മേടമാസത്തിലെ രാശ്യോദയാല്‍ പത്താം നാള്‍ ആദിത്യന് പൂജ ചെയ്യാന്‍ ആവണപ്പലക സജ്ജമാക്കുന്നു.
സൂര്യദേവന്‍ ഏറ്റവും ഉയരത്തില്‍ വരുന്ന ദിനം ആവണപ്പലകയിലിരുന്ന് പൂജ ചെയ്യുന്ന പുരോഹിതന് സര്‍വ്വ ഐശ്വര്യങ്ങളും വിശ്വകര്‍മ്മാവ് നല്‍കപ്പെടുമത്രേ. അന്നേദിനം ആ പലകയില്‍ നിന്നും പ്രതിഫലിക്കുന്ന ഉത്തമതേജസ്സ് പുരോഹിതന് വീണ്ടും വീണ്ടും കര്‍മ്മശുദ്ധി ഉണ്ടാക്കുകയും, ആ ശക്തി വീണ്ടും ആവണപ്പലകയിലേയ്ക്ക് പുരോഹിതന് ആവാഹിക്കുകയും ചെയ്യുന്നു. അപ്രകാരം പീഠത്തിന് അനസ്യൂതം ശക്തി പ്രതിഫലിക്കാനും, ആര്‍ജ്ജിക്കാനുമാകുമത്രേ. ഇത്തരത്തില്‍ ശക്തിവരുത്തിയ ആവണപ്പലക വൈദികകാല വിശ്വകര്‍മ്മാക്കളുടെ പൗരോഹിത്യ കര്‍മ്മത്തിന് ദിനംപ്രതി മാറ്റുകൂട്ടിയിരുന്നു.
വൈദിക കാലഘട്ടത്തില്‍ നിലമരത്തില്‍ നിര്‍ത്തികൊത്തിയെടുക്കുന്ന ആവണപ്പലകയ്ക്ക് ആയിരം സംവത്സരത്തോളം ആയുസ്സ് മനുബ്രഹ്മ സന്തതികള്‍ നിശ്ചയിച്ചിരുന്നത്രേ. ആവണപ്പലക നിര്‍മ്മിച്ച് ആദ്യമായി അതിലിരുന്ന് പൂജ ചെയ്യുന്ന പുരോഹിതന് അന്നദാനം നടത്തുമായിരുന്നു. ദുര്‍മന്ത്രവാദവും, ആഭിചാര പ്രവൃത്തികളും, മദ്യം, മാംസം മുതലായവ ഉപയോഗിച്ചുള്ള പൂജകള്‍ക്കും വിധികളോടെ തയ്യാറാക്കിയ ആവണപ്പലക ഉപയോഗിക്കില്ല. ആവണപ്പലകയെ ബഹുമാനിക്കാത്ത പൂജാരിമാര്‍ ചെയ്യുന്ന പൂജയ്ക്ക് പൂര്‍ണ്ണത ഉണ്ടാവുകയില്ലത്രേ.
കലശപൂജ, പ്രതിഷ്ഠാപൂജ എന്നിവപോലുള്ള വിശേഷപൂജകള്‍ ആരംഭിക്കും മുമ്പ് നിലത്ത് ദര്‍ഭ വിരിച്ച് അതിലിരുന്ന് ആവണപ്പലക ചാണകം മെഴുകി ശുദ്ധി ചെയ്ത സ്ഥലത്ത് വച്ച് ശുദ്ധിയോടെ പ്രണവം ജപിച്ച് ഗുരുവിനെ ധ്യാനിച്ച് ദീക്ഷാമന്ത്രം ജപിച്ച് പഞ്ചോപചാരത്തോടെ മണിമുഴക്കി കര്‍പ്പൂര ആരതി നടത്തണം. ശേഷം ആവണപ്പലകയെ തൊട്ട് സാഷ്ടാംഗം നമസ്ക്കരിച്ച ശേഷം പഞ്ചഭൂതാത്മക പ്രതീകമായ ആവണപ്പലകയെ മൂന്ന് പ്രദക്ഷിണം ചെയ്ത് മുമ്പില്‍ നിന്ന് തൊഴുകയ്യോടെ യജമാനനോടും, ഭാരവാഹികളോടും, ഭക്തജനങ്ങളോടും അനുവാദം ചോദിച്ചതിന് ശേഷം മാത്രമേ ആവണിപ്പലകയില്‍ ഇരിക്കാന്‍ പാടുള്ളൂ. ഇരിക്കും മുമ്പ് ആവണപ്പലക പൂജിച്ച പുഷ്പങ്ങള്‍ കൂട്ടിവാരി ഒരു ഭാഗം ക്ഷേത്ര/ഭവന/ യജ്ഞ യജമാനനും ബാക്കി പരികര്‍മ്മികള്‍ക്കും, ശിഷ്യര്‍ക്കും, ഭക്തജനങ്ങല്‍ക്കും നല്‍കിയശേഷം കൈശുദ്ധി വരുത്തി പൂജകള്‍ ആരംഭിക്കാം.
പൂജ കഴിയുമ്പോഴും വെള്ളം തളിച്ച് തുടച്ച് കുറിയിട്ട് മന്ത്രതന്ത്ര ലോപങ്ങള്‍ക്കുള്ള പ്രായശ്ചിത്താര്‍ത്ഥം പുഷ്പാക്ഷതങ്ങള്‍ എടുത്ത് തൊഴുത് പ്രാര്‍ത്ഥിച്ച് ക്ഷമാപണം നടത്തി വീണ്ടും നമസ്ക്കരിച്ച് അതില്‍ വസ്ത്രം, വെറ്റില, അടക്കയും ദക്ഷിണയായി വയ്ക്കണം. തുടര്‍ന്ന് ഭക്തജനങ്ങള്‍ക്ക് ആവണപ്പലകയില്‍ ദക്ഷിണ സമര്‍പ്പിക്കാനും നമസ്ക്കരിക്കാനും അനുവദിക്കുന്നു. ആവണപ്പലകയില്‍ സമര്‍പ്പിക്കുന്ന ദക്ഷിണ പൂജ ചെയ്ത ആചാര്യനുള്ളതാണത്രേ. ആവണപ്പലകയില്‍ തൊട്ടുതൊഴുകയോ, നമസ്ക്കരിക്കുകയോ ചെയ്യുമ്പോള്‍ ആചാര്യപാദങ്ങളില്‍ നമസ്ക്കരിക്കുന്നതിന് തുല്യമാണത്രേ. ആവണപ്പലകയുടെ നിര്‍മ്മാണത്തിന് ശിഷ്ടം വരുന്ന തടിക്കഷണങ്ങള്‍ ഗണപതി ഹോമത്തിനായി ഉപയോഗിക്കാം.
എസ്.പി.ജെ