വീട്ടിൽ നിലവിളക്ക് കൊളുത്താൻ കഴിഞ്ഞില്ലേ? ദോഷമുണ്ടാകുമോ..

വീട്ടിൽ നിലവിളക്ക് കൊളുത്തുന്നത് ഒരു ആചാരം മാത്രമല്ല, ഐശ്വര്യത്തിന്റെയും ശുഭതയുടെയും പ്രതീകമായാണ് പലരും കാണുന്നത്. രാവിലെയും വൈകിട്ടും നിലവിളക്ക് തെളിയിക്കുന്ന പതിവ് കേരളത്തിലെ നിരവധി വീടുകളിൽ ഇന്നും തുടരുന്നു. എന്നാൽ ചില സാഹചര്യങ്ങളിൽ ഒരു നേരം വിളക്ക് കൊളുത്താൻ കഴിയാതെ വന്നാൽ ദോഷമുണ്ടാകുമോ എന്ന സംശയം പലർക്കുമുണ്ട്.

ഹൈന്ദവ വിശ്വാസപ്രകാരം നിലവിളക്കിന്റെ ഓരോ ഭാഗത്തിനും പ്രത്യേക ദൈവിക സങ്കൽപ്പങ്ങളുണ്ട്. ചുവടുഭാഗം ബ്രഹ്മാവിനെയും തണ്ട് വിഷ്ണുവിനെയും മുകൾഭാഗം ശിവനെയും നാളം ലക്ഷ്മിയെയും പ്രകാശം സരസ്വതിയെയും നാളത്തിലെ ചൂട് പാർവതിയെയും സൂചിപ്പിക്കുന്നുവെന്നാണ് വിശ്വാസം. അതുകൊണ്ടുതന്നെ നിലവിളക്കിനെ ഈശ്വരന്റെ പ്രതീകമായാണ് കണക്കാക്കുന്നത്.

വിളക്ക് കൊളുത്തുന്നതിന് മുൻപ് ദേഹശുദ്ധി വരുത്തണമെന്നതാണ് ആചാരപരമായ നിർദേശം. നിലവിളക്ക് അശുദ്ധമാകുന്നത് കുടുംബത്തിന്റെ ഐശ്വര്യത്തെ ബാധിക്കുമെന്ന വിശ്വാസവും നിലനിൽക്കുന്നുണ്ട്.

അതേസമയം, സാഹചര്യം മൂലം ഒരു നേരം വിളക്ക് തെളിയിക്കാൻ സാധിക്കാതെ വന്നാൽ അതിനെ വലിയ ദോഷമായി കാണേണ്ടതില്ലെന്നാണ് വിശ്വാസം. വിളക്ക് കൊളുത്തുന്നത് മുടങ്ങിയതുകൊണ്ട് ഈശ്വരകോപമോ അനിഷ്ടഫലങ്ങളോ ഉണ്ടാകുമെന്നതിന് അടിസ്ഥാനമില്ലെന്നും പറയുന്നു. ഭക്തിയോടെയും ആത്മാർഥതയോടെയും ആരാധന നടത്തുന്നതിനാണ് കൂടുതൽ പ്രാധാന്യം.

ഒരു ദിവസം ഒരു നേരം മാത്രമേ വിളക്ക് കൊളുത്താൻ സാധിക്കുന്നുള്ളൂവെങ്കിലും അതിൽ ദോഷമില്ല. കുറച്ചുസമയം മാത്രമെങ്കിലും വിളക്ക് തെളിയിക്കുന്നത് വിളക്ക് പൂർണമായും ഒഴിവാക്കുന്നതിനെക്കാൾ ഉത്തമമാണെന്നും വിശ്വാസമുണ്ട്.

വിളക്ക് തെളിയിക്കുന്നത് മുടങ്ങിയ ശേഷം വീണ്ടും വിളക്ക് കൊളുത്തുമ്പോൾ ക്ഷമാപണമന്ത്രം ചൊല്ലുന്നത് ഉത്തമമാണെന്നും ആചാരവിശ്വാസങ്ങളിൽ പറയുന്നു. ശിവനെ സ്മരിച്ചുകൊണ്ടുള്ള ഈ മന്ത്രത്തിലൂടെ അറിഞ്ഞും അറിയാതെയും സംഭവിച്ച തെറ്റുകൾക്ക് ക്ഷമ ചോദിക്കുകയാണ് ചെയ്യുന്നത്.

ക്ഷമാപണമന്ത്രം:

“ഓം കരചരണകൃതം വാ കായജം കർമജം വാ
ശ്രവണനയനജം വാ മാനസം വാപരാധം
വിഹിതമവിഹിതം വാ സർവമേതത് ക്ഷമസ്വ
ശിവശിവ കരുണാബ്ധേ ശ്രീമഹാദേവ ശംഭോ.”

വിളക്ക് തെളിയിക്കുന്നതിലെ കൃത്യനിഷ്ഠയെക്കാൾ ഭക്തിയോടെയും ശുദ്ധമായ മനസ്സോടെയും ചെയ്യുന്ന ആരാധനയ്ക്കാണ് പ്രാധാന്യമെന്നാണ് വിശ്വാസം. അതിനാൽ സാഹചര്യങ്ങൾ മൂലം ഒരു നേരം വിളക്ക് കൊളുത്താൻ കഴിയാതെ വന്നാൽ ഭയപ്പെടേണ്ടതില്ല.