രാഹുദോഷമുള്ള നാളുകാരും ജ്യോതിഷത്തിൽ പറയുന്ന പ്രധാന പരിഹാരങ്ങളും

രാഹുദോഷം മാറാൻ എന്തുചെയ്യണം എന്നത് ജ്യോതിഷവിശ്വാസികൾക്കിടയിലെ പ്രധാന ചോദ്യങ്ങളിലൊന്നാണ്. ജാതകത്തിൽ രാഹുവിന്റെ ദോഷസ്ഥിതിയുള്ളവരും രാഹുവിന്റെ സ്വാധീനമുള്ള നക്ഷത്രങ്ങളിൽ ജനിച്ചവരും പ്രത്യേക വഴിപാടുകളും ദേവീപൂജകളും നടത്തുന്നത് ഗുണകരമാണെന്നാണ് ജ്യോതിഷത്തിലെ വിശ്വാസം.

തിരുവാതിര, ചോതി, ചതയം എന്നിവ രാഹുവിന്റെ ആധിപത്യമുള്ള നക്ഷത്രങ്ങളായാണ് കണക്കാക്കുന്നത്. പൂയം, അനിഴം, ഉത്തൃട്ടാതി എന്നീ നക്ഷത്രങ്ങൾക്കും രാഹുവിന്റെ സ്വാധീനമുണ്ടെന്നാണ് പറയപ്പെടുന്നത്. ഇത്തരം നക്ഷത്രങ്ങളിൽ ജനിച്ചവർ രാഹുപ്രീതിക്കായി പതിവായി ദേവീക്ഷേത്രങ്ങളിൽ വഴിപാടുകൾ നടത്തുന്നത് ഉത്തമമാണെന്നും ജ്യോതിഷികൾ നിർദേശിക്കുന്നു.

രാഹുകാലത്ത് നാരങ്ങാവിളക്ക്

രാഹുദോഷ പരിഹാരങ്ങളിൽ പ്രധാനപ്പെട്ട ഒന്നായി കണക്കാക്കുന്നത് ദേവീക്ഷേത്രങ്ങളിൽ നാരങ്ങാവിളക്ക് തെളിയിക്കലാണ്. ചെറുനാരങ്ങ രണ്ടായി മുറിച്ച് നീര് പിഴിഞ്ഞ ശേഷം പുറന്തോട് അകത്തേക്ക് വരുന്ന രീതിയിൽ മറിച്ചുവെച്ച് അതിൽ എള്ളെണ്ണയോ നെയ്യോ ഒഴിച്ച് തിരിയിട്ട് കത്തിക്കുന്നതാണ് നാരങ്ങാവിളക്ക്.

അഞ്ച്, ഏഴ്, ഒൻപത് തുടങ്ങിയ ഒറ്റ സംഖ്യകളിൽ നാരങ്ങാവിളക്ക് തെളിയിക്കുന്നതാണ് ഉത്തമമെന്നാണ് വിശ്വാസം. ദേവിക്ക് പ്രാധാന്യമുള്ള ചൊവ്വ, വെള്ളി ദിവസങ്ങളിൽ രാഹുകാലത്ത് നാരങ്ങാവിളക്ക് തെളിയിച്ച് ദേവിയെ ഭജിക്കുന്നതും പ്രത്യേക ഫലപ്രദമാണെന്ന് ജ്യോതിഷത്തിൽ പറയുന്നു.

വിളക്ക് തെളിയിച്ച ശേഷം ദേവീമന്ത്രങ്ങൾ ജപിക്കുന്നതും നല്ലതാണെന്നാണ് വിശ്വാസം. ഹനുമാൻ സ്വാമിയുടെയും നവഗ്രഹങ്ങളുടെയും സന്നിധിയിലും നാരങ്ങാവിളക്ക് തെളിയിക്കാറുണ്ട്.

കാര്യസിദ്ധിക്കായും നാരങ്ങാവിളക്ക്

കാര്യസിദ്ധിക്കും രാഹുപ്രീതിക്കുമായി നാരങ്ങാവിളക്ക് തെളിയിക്കുന്ന പതിവുണ്ട്. പ്രത്യേകിച്ച് ചൊവ്വാഴ്ച ഉച്ചയ്ക്കുശേഷമുള്ള രാഹുകാലത്ത് ദേവീക്ഷേത്രത്തിൽ നാരങ്ങാവിളക്ക് തെളിയിക്കുന്നത് കാര്യസിദ്ധിക്ക് ഗുണകരമാണെന്നാണ് വിശ്വാസം.

നാരങ്ങയുടെ പുറന്തോടിൽ എള്ളെണ്ണയോ നെയ്യോ ഒഴിച്ച് അഗ്നിയെ സാക്ഷിയാക്കി മന്ത്രോച്ചാരണങ്ങളോടെ ദേവിയെ ആരാധിക്കുന്നത് ഒരു ഹോമം നടത്തുന്നതിന് സമാനമായ ഫലം നൽകുമെന്ന സങ്കൽപ്പവും നിലനിൽക്കുന്നു.

രാഹുദോഷത്തിന് ദേവീപൂജ എന്തുകൊണ്ട്?

രാഹു ദേവിയുടെ ഉപാസകനും സേവകനുമാണെന്നാണ് ജ്യോതിഷ വിശ്വാസം. രാശിചക്രത്തിൽ രാഹുവിന് സ്വന്തമായി രാശിയില്ലെന്നും ദേവിയുടെ പ്രാതിനിധ്യം വഹിക്കുന്ന ശുക്രന്റെ സ്വക്ഷേത്രമായ ഇടവത്തിൽ രാഹുവിന് സ്ഥാനം ലഭിക്കുന്നുവെന്നും ജ്യോതിഷത്തിൽ പറയുന്നു.

ഇതിന്റെ അടിസ്ഥാനത്തിലാണ് രാഹു സൃഷ്ടിക്കുന്ന ദോഷങ്ങൾക്ക് ദേവിയെ ആരാധിക്കുന്നത് പ്രധാന പരിഹാരമായി കണക്കാക്കുന്നത്. രാഹുദശ, മറ്റ് ദശകളിലെ രാഹു അപഹാരം, ഗോചരത്തിൽ രാഹുവിന്റെ പ്രതികൂല സ്ഥാനമാറ്റം തുടങ്ങിയ ഘട്ടങ്ങളിലും ദേവീപൂജയും രാഹുപ്രീതിക്കായുള്ള വഴിപാടുകളും നടത്തുന്നത് ഗുണകരമാണെന്നാണ് വിശ്വാസം.