കൊല്ലവർഷം 1202: സമ്പൂർണ വർഷഫലം

പുതിയ പ്രതീക്ഷകളുമായി മുന്നോട്ടുപോകുന്ന വർഷത്തിൽ ഓരോ കൂറുകാർക്കും വ്യത്യസ്ത അനുഭവങ്ങളാണ് പ്രവചിക്കപ്പെടുന്നത്. ചിലർക്ക് സാമ്പത്തിക നേട്ടങ്ങളും സ്ഥാനക്കയറ്റവും ലഭിക്കുമ്പോൾ മറ്റുചിലർക്ക് സാമ്പത്തിക നിയന്ത്രണവും കൂടുതൽ പരിശ്രമവും ആവശ്യമായി വരും. സാമ്പത്തികമായും തൊഴിൽപരമായും കൂടുതൽ അനുകൂല ഫലങ്ങൾ പ്രതീക്ഷിക്കാവുന്ന കൂറുകളിൽ മേടം, മിഥുനം, കർക്കടകം, കന്നി, തുലാം, വൃശ്ചികം എന്നിവ ഉൾപ്പെടുന്നു. ചിങ്ങം, ധനു, കുംഭം, മീനം തുടങ്ങിയ കൂറുകാർക്ക് കൂടുതൽ ജാഗ്രതയും ക്ഷമയും ആവശ്യമായ കാലഘട്ടമായിരിക്കും. രണ്ടാം പകുതിയിൽ പല കൂറുകാർക്കും കാര്യങ്ങൾ മെച്ചപ്പെടുമെന്നാണ് പൊതുവായ പ്രവചനം. കുടുംബജീവിതം, തൊഴിൽ, ആരോഗ്യം, വിവാഹം, വിദേശയാത്ര തുടങ്ങിയ മേഖലകളിലെ കൂറ് ഫലങ്ങൾ അറിയാം.

മേടക്കൂറ്: കുടുംബത്തിൽ സന്തോഷവും സമാധാനവും ഐശ്വര്യവും നിലനിൽക്കും. സ്വന്തമായി വീട് എന്ന സ്വപ്നം സഫലമാകാൻ സാധ്യത. വിദേശയാത്രയ്ക്കും ജോലി മാറ്റത്തിനും അനുകൂല സമയമാണ്. മക്കളുടെ നേട്ടങ്ങൾ സന്തോഷം നൽകും. സാമ്പത്തിക സ്ഥിതി മെച്ചമായിരിക്കുമെങ്കിലും ആരോഗ്യത്തിൽ ശ്രദ്ധ വേണം.

ഇടവക്കൂറ്: തൊഴിൽ വരുമാനം ഉയരും. സാമ്പത്തിക കാര്യങ്ങളിൽ സൂക്ഷ്മത വേണം. കൂടുതൽ പരിശ്രമിച്ചാൽ മാത്രമേ പല കാര്യങ്ങളും നേടിയെടുക്കാനാകൂ. മക്കളുടെ ചെലവുകൾ വർധിക്കാം. ആദ്യപകുതി സമ്മിശ്രമായിരിക്കുമെങ്കിലും രണ്ടാം പകുതി കൂടുതൽ അനുകൂലമാകും.

മിഥുനക്കൂറ്: സാമ്പത്തിക നേട്ടങ്ങൾ പ്രതീക്ഷിക്കാം. കഴിഞ്ഞകാലത്തെ ബുദ്ധിമുട്ടുകൾക്ക് പരിഹാരമുണ്ടാകും. വിദ്യാർഥികൾക്ക് മികച്ച വിജയം നേടാം. സ്ഥാനക്കയറ്റത്തിനും ബിസിനസ് വളർച്ചയ്ക്കും സാധ്യത. പുതിയ സംരംഭങ്ങൾ ആരംഭിക്കാം. കൂട്ടുകച്ചവടത്തിൽ ജാഗ്രത വേണം.

കർക്കടകക്കൂറ്: പൊതുവേ ഭാഗ്യം അനുകൂലിക്കുന്ന വർഷം. തൊഴിൽരംഗത്ത് പുരോഗതിയും കുടുംബത്തിൽ സന്തോഷവും ഉണ്ടാകും. മക്കളുടെ നേട്ടങ്ങൾ പ്രതീക്ഷിക്കാം. കലാരംഗത്തും തിരഞ്ഞെടുപ്പുകളിലും വിജയം നേടാൻ സാധ്യത. പുതിയ സൗഹൃദങ്ങൾ നേട്ടങ്ങൾക്ക് വഴിയൊരുക്കും.

ചിങ്ങക്കൂറ്: സാമ്പത്തിക സമ്മർദവും അനാവശ്യ ചെലവുകളും ഉണ്ടാകാം. പുതിയ സംരംഭങ്ങൾ ആരംഭിക്കാൻ അനുയോജ്യമായ സമയമല്ല. എതിർപ്പുകളും തടസ്സങ്ങളും നേരിടേണ്ടി വരാം. നിലവിലെ കാര്യങ്ങൾ തുടരുന്നതിൽ പ്രശ്നമുണ്ടാകില്ല. വർഷാവസാനത്തോടെ സ്ഥിതി മെച്ചപ്പെടും.

കന്നിക്കൂറ്: സാമ്പത്തിക പുരോഗതിക്കും സ്ഥാനക്കയറ്റത്തിനും സാധ്യത. ഏറെക്കാലമായി കാത്തിരുന്ന പല കാര്യങ്ങളും സഫലമാകും. സന്താനഭാഗ്യവും മക്കളിൽനിന്നുള്ള സന്തോഷവാർത്തകളും പ്രതീക്ഷിക്കാം. പുതിയ സംരംഭങ്ങൾക്കും വീട്, കുടുംബസ്വത്ത് എന്നിവ സ്വന്തമാക്കുന്നതിനും അനുകൂല സാഹചര്യം. ദാമ്പത്യബന്ധത്തിൽ അകൽച്ച വരാതിരിക്കാൻ ശ്രദ്ധ വേണം.

തുലാക്കൂറ്: സാമ്പത്തികമായി നേട്ടങ്ങൾ തുടരും. കുടുംബത്തിൽ സമാധാനവും സന്തോഷവും നിലനിൽക്കും. തൊഴിൽരംഗത്ത് അധ്വാനം വർധിക്കാം. ബന്ധുക്കളുമായുള്ള അഭിപ്രായവ്യത്യാസങ്ങൾ പരിഹരിക്കാനാകും. ആരോഗ്യകാര്യത്തിൽ വലിയ ആശങ്കകൾ വേണ്ട. രണ്ടാം പകുതി കൂടുതൽ ഗുണകരം.

വൃശ്ചികക്കൂറ്: ഭാഗ്യവും ഈശ്വരാനുകൂല്യവും ലഭിക്കുന്ന വർഷം. സാമ്പത്തിക നില മെച്ചപ്പെടും. പുതിയ സംരംഭങ്ങൾ തുടങ്ങാം. ബിസിനസിൽ വളർച്ചയും അംഗീകാരവും ലഭിക്കും. മക്കളുടെ വിജയത്തിൽ സന്തോഷിക്കാം. പുതിയ ചുമതലകളും ഉത്തരവാദിത്തങ്ങളും ഏറ്റെടുക്കേണ്ടി വരും.

ധനുക്കൂറ്: ഗുണദോഷ സമ്മിശ്രമായ വർഷം. തൊഴിൽരംഗത്ത് പുരോഗതിയുണ്ടാകും. യാത്രകൾ വർധിക്കും. കുടുംബത്തിൽ ചില അസ്വസ്ഥതകൾക്കും വാഹനവുമായി ബന്ധപ്പെട്ട ചെലവുകൾക്കും സാധ്യത. ആരോപണങ്ങൾക്കും അപവാദങ്ങൾക്കും ഇടയാക്കുന്ന സാഹചര്യങ്ങൾ ഒഴിവാക്കുക. പുതിയ സംരംഭങ്ങൾക്ക് രണ്ടാം പകുതി വരെ കാത്തിരിക്കുന്നതാണ് നല്ലത്.

മകരക്കൂറ്: പുതിയ ഉത്തരവാദിത്തങ്ങൾ ഏറ്റെടുക്കും. വരുമാനം വർധിക്കും. അവിവാഹിതർക്ക് വിവാഹയോഗം. കുടുംബജീവിതം സന്തോഷകരമാകും. മക്കളുടെ നേട്ടങ്ങൾ ആഹ്ലാദം നൽകും. എന്നാൽ രണ്ടാം പകുതിയിൽ സാമ്പത്തിക ഞെരുക്കവും ചില തടസ്സങ്ങളും നേരിടേണ്ടി വരാം.

കുംഭക്കൂറ്: സാമ്പത്തിക സമ്മർദം അനുഭവപ്പെടാം. കാര്യങ്ങൾ നേടിയെടുക്കാൻ ഒന്നിലധികം തവണ ശ്രമിക്കേണ്ടി വരും. വിദ്യാർഥികൾ പഠനത്തിൽ കൂടുതൽ ശ്രദ്ധിക്കണം. ചിലർക്ക് വിദേശയാത്രയ്ക്കും അവിവാഹിതർക്ക് വിവാഹത്തിനും സാധ്യത. ആദ്യപകുതിയിലെ ബുദ്ധിമുട്ടുകൾ രണ്ടാം പകുതിയിൽ കുറയും.

മീനക്കൂറ്: സ്ഥാനക്കയറ്റത്തിനും സാമ്പത്തിക നേട്ടത്തിനും സാധ്യത. ഉദ്യോഗാർഥികൾക്ക് ജോലി ലഭിക്കാം. വിദേശയാത്രയ്ക്ക് അനുകൂല സമയമാണ്. സർക്കാർ ജീവനക്കാർക്ക് സ്ഥലംമാറ്റം ലഭിക്കാം. ആരോഗ്യത്തിൽ ശ്രദ്ധ ആവശ്യമാണ്. രണ്ടാം പകുതിയിൽ കാര്യങ്ങൾ മന്ദഗതിയിലാകാനും സാമ്പത്തിക ബുദ്ധിമുട്ടുകൾ അനുഭവപ്പെടാനും സാധ്യത.