സന്താനഭാഗ്യവും തടസ്സങ്ങളും ജ്യോതിഷവീക്ഷണത്തിലൂടെ
അഞ്ചാം ഭാവവും ഒന്പതാം ഭാവവും ശക്തമായാല് സന്താനലാഭവും വംശവര്ദ്ധനയും ഉണ്ടാകുമെന്നാണ് ആചാര്യമതം. വേദജ്യോതിഷത്തില് സന്താനഭാഗ്യം നിര്ണ്ണയിക്കുന്നതില് പ്രധാന പങ്കുവഹിക്കുന്നത് അഞ്ചാം ഭാവം(പുത്രസ്ഥാനം), ലഗ്നം, ഏഴാം ഭാവം, ഒന്പതാം ഭാവം എന്നിവയാണ്. ഇവയുടെ ശക്തിയും അവസ്ഥയും അനുസരിച്ചാണ് ഒരാളുടെ സന്താനയോഗം, സന്താനലാഭത്തിലെ കാലതാമസം, അല്ലെങ്കില് തടസ്സങ്ങള് എന്നിവ വിലയിരുത്തപ്പെടുന്നത്.
അഞ്ചാംഭാവം പുത്രസ്ഥാനം എന്നറിയപ്പെടുന്നു. സന്താനം, ബുദ്ധി, പൂര്വ്വജന്മസുകൃതം, മാനസിക സൃഷ്ടിശേഷി എന്നിവയെ ഇത് പ്രതിനിധീകരിക്കുന്നു. അതിനാല് സന്താനഭാഗ്യം പരിശോധിക്കുമ്പോള് ആദ്യം പരിഗണിക്കേണ്ടത് അഞ്ചാം ഭാവത്തിന്റെയും അതിന്റെ അധിപതിയുടെയും ശക്തിയാണ്. അഞ്ചാം ഭാവാധിപതി ആറാം, എട്ടാം, പന്ത്രണ്ടാം ഭാവങ്ങളായ ദുഷ്ടസ്ഥാനങ്ങളില് സ്ഥിതി ചെയ്യുകയോ, നീചസ്ഥിതിയിലോ അസ്തംഗതിയിലോ ആകുകയോ ചെയ്താല് സന്താനലാഭത്തില് കാലതാമസം ഉണ്ടാകാം. അതുപോലെ അഞ്ചാം ഭാവത്തില് രാഹു, കേതു, ശനി, ചൊവ്വ തുടങ്ങിയ പാപഗ്രഹങ്ങള് സ്ഥിതി ചെയ്യുകയോ അവയുടെ ദൃഷ്ടി പതിക്കുകയോ ചെയ്താല് പുത്രദോഷസാദ്ധ്യത വര്ദ്ധിക്കും.
ലഗ്നവും ഏഴാം ഭാവവും
സന്താനയോഗത്തില് നിര്ണ്ണായകമാണ്. ലഗ്നം വ്യക്തിയുടെ ശരീരഘടന, ആരോഗ്യം, ജീവശക്തി എന്നിവയെ സൂചിപ്പിക്കുമ്പോള് ഏഴാം ഭാവം ദാമ്പത്യജീവിതത്തെയും പങ്കാളിയെയും പ്രതിനിധീകരിക്കുന്നു. ലഗ്നവും ലഗ്നാധിപതിയും ശക്തമായിരിക്കണം. അതുപോലെ ഏഴാം ഭാവവും അതിന്റെ അധിപതിയും ദോഷരഹിതമായിരിക്കണം. ഇവയ്ക്ക് ദൗര്ബല്യമുണ്ടെങ്കില് ആരോഗ്യപ്രശ്നങ്ങള്, ദാമ്പത്യത്തിലെ അസമന്വയം, മാനസിക സമ്മര്ദ്ദങ്ങള് എന്നിവ മൂലം സന്താനലാഭം വൈകാന് സാധ്യതയുണ്ട്.
ഒന്പതാംഭാവം പൂര്വ്വപുണ്യ സ്ഥാനം എന്നറിയപ്പെടുന്നു. പിതൃഅനുഗ്രഹം, ഭാഗ്യം, ധര്മ്മം, പൂര്വ്വജന്മസുകൃതം എന്നിവയുടെ സൂചകമാണ് ഈ ഭാവം. ഒന്പതാം ഭാവത്തിന് ഗുരുതരമായ പാപദോഷമുണ്ടെങ്കില് പിതൃദോഷത്തിന്റെ സൂചനയായി കണക്കാക്കുന്നു. പൂര്വ്വികരുടെ അനുഗ്രഹക്കുറവും പൂര്വ്വപുണ്യ ദൗര്ബല്യവും സന്താനലാഭത്തില് തടസ്സങ്ങള് സൃഷ്ടിക്കുമെന്നാണ് ജ്യോതിഷശാസ്ത്രത്തിന്റെ നിലപാട്. അതിനാല് അഞ്ചാം ഭാവത്തോടൊപ്പം ഒന്പതാം ഭാവത്തിന്റെ ശക്തിയും സന്താനയോഗനിര്ണ്ണയത്തില് അത്യന്താപേക്ഷിതമാണ്.
സന്താനഭാഗ്യം നിര്ണ്ണയിക്കുന്നതില് പ്രധാന ഗ്രഹങ്ങളുടെ പങ്ക്
സന്താനഭാഗ്യം നിര്ണ്ണയിക്കുന്നതില് ഭാവങ്ങളുടെ ശക്തിയോടൊപ്പം ചില പ്രധാന ഗ്രഹങ്ങളുടെ അസ്വസ്ഥതയും അത്യന്തം നിര്ണ്ണായകമാണ്. പ്രത്യേകിച്ച് ഗുരു, ശുക്രന്, ചൊവ്വ എന്നീ ഗ്രഹങ്ങള് സന്താനയോഗവുമായി നേരിട്ട് ബന്ധപ്പെട്ടവയാണ്.
ഗുരു(ബൃഹസ്പതി) ജ്യോതിഷശാസ്ത്രത്തില് പുത്രകാരന് എന്നറിയപ്പെടുന്നു. സന്താനം, വംശവര്ദ്ധനം, ധാര്മ്മികത, അനുഗ്രഹം എന്നിവയുടെ പ്രധാന സൂചകമാണ് ഗുരു. ജാതകത്തില് ഗുരു ശക്തമായിരിക്കുകയാണെങ്കില് സന്താനലാഭത്തിനുള്ള സാധ്യത വര്ദ്ധിക്കും. എന്നാല് ഗുരു നീചസ്ഥിതിയില്, അസ്തംഗതനായി, ശത്രുരാശിയില് അല്ലെങ്കില് പാപഗ്രഹങ്ങളുടെ ശക്തമായ ബാധയില് ആയാല് സന്താനകാര്യങ്ങളില് തടസ്സങ്ങളോ കാലതാമസമോ ഉണ്ടാകാം. പ്രത്യേകിച്ച് ഗുരു രാഹുവിനോടൊപ്പം ചേര്ന്ന് ഗുരുചാണ്ഡാളയോഗം രൂപപ്പെടുമ്പോള് പുത്രകാരകന്റെ ശുഭഫലം കുറയുകയും സന്താനലാഭത്തിന് പ്രതിബന്ധങ്ങള് ഉണ്ടാകുകയും ചെയ്യാം. ഇത്തരത്തിലുള്ള സാഹചര്യങ്ങളെ ജ്യോതിഷത്തില് പുത്രദോഷത്തിന്റെ പ്രധാന കാരണങ്ങളിലൊന്നായി കണക്കാക്കുന്നു.
ശുക്രന് പ്രത്യുല്പ്പാദനശേഷി, ലൈംഗികാരോഗ്യം, ഹോര്മോണ് സമതുലിതാവസ്ഥ, പ്രജനനാവയവങ്ങളുടെ പ്രവര്ത്തനം എന്നിവയെ സൂചിപ്പിക്കുന്നു. പുരുഷന്മാരിലും സ്ത്രീകളിലും ഗര്ഭധാരണത്തിനാവശ്യമായ ജൈവശേഷിയുമായി ശുക്രന് അടുത്തബന്ധമുണ്ട്.
ചൊവ്വ രക്തധാതു ജീവശക്തി, ശരീരത്തിലെ പ്രവര്ത്തനശേഷി, സ്ത്രീകളില് ഗര്ഭാശയത്തിന്റെയും പ്രത്യുല്പ്പാദനസംവിധാനത്തിന്റെയും കരുത്ത് എന്നിവയെ പ്രതിനിധീകരിക്കുന്നു. ചൊവ്വയുടെ ദൗര്ബല്യം അല്ലെങ്കില് പാപബാധ ചിലപ്പോള് ഗര്ഭധാരണവുമായി ബന്ധപ്പെട്ട് ആരോഗ്യപ്രശ്നങ്ങള്ക്ക് കാരണമാകാം. അതുകൊണ്ട് സന്താനഭാഗ്യം പരിശോധിക്കുമ്പോള് ഗുരുവിന്റെ ശക്തിയോടൊപ്പം ശുക്രന്റെയും ചൊവ്വയുടെയും സ്ഥാനം, ബലം, ദൃഷ്ടികള്, സംയോജനങ്ങള് എന്നിവയും സൂക്ഷ്മമായി വിലയിരുത്തേണ്ടതാണ്. ഈ ഗ്രഹങ്ങള് ശുഭബലത്തോടെ നിലകൊള്ളുമ്പോള് ആരോഗ്യകരമായ ദാമ്പത്യജീവിതത്തിനും സന്താനലാഭത്തിനും മികച്ച പിന്തുണ ലഭിക്കുന്നു.
സന്താനലാഭം വൈകിക്കുന്ന പ്രധാന ദോഷങ്ങള്
അഞ്ചാം ഭാവാധിപതി ദുര്ബലമാവുകയും പാപഗ്രഹങ്ങളുടെ സ്വാധീനത്തില്പ്പെടുകയും ചെയ്താല് സന്താനകാര്യങ്ങളില് തടസ്സമോ കാലതാമസമോ ഉണ്ടാകാം.
ജ്യോതിഷശാസ്ത്രത്തില് സന്താനലാഭത്തില് കാലതാമസം ഉണ്ടാകുന്നതിനോ ഗര്ഭധാരണത്തില് തടസ്സങ്ങള് നേരിടുന്നതിനോ ചില പ്രത്യേക ദോഷങ്ങള് കാരണമാകുന്നതായി പറയപ്പെടുന്നു. ഇവയില് പ്രധാനപ്പെട്ടവയാണ്. സര്പ്പദോഷം(രാഹു-കേതു ദോഷം), പിതൃദോഷം, (ശനി-ചൊവ്വ ദോഷം) എന്നിവ.
സര്പ്പദോഷം അഥവാ രാഹു-കേതു ദോഷം സന്താനകാര്യങ്ങളില് ഏറ്റവും കൂടുതല് ചര്ച്ച ചെയ്യപ്പെടുന്ന ദോഷങ്ങളിലൊന്നാണ്. അഞ്ചാം ഭാവത്തില് രാഹുവോ കേതുവോ സ്ഥിതി ചെയ്യുകയോ, അഞ്ചാം ഭാവാധിപതിയുമായി രാഹു-കേതു സംയോജിക്കുകയോ ചെയ്താല് ഈ ദോഷം രൂപപ്പെടുന്നു. ഇതിന്റെ ഫലമായി ഗര്ഭധാരണത്തില് ദീര്ഘകാല താമസം, ആവര്ത്തിച്ചുള്ള രക്തസ്രാവം, അല്ലെങ്കില് വംശവര്ദ്ധനയില് തടസ്സങ്ങള് എന്നിവ ഉണ്ടാകാമെന്നാണ് ജ്യോതിഷപരമായ വിലയിരുത്തല്. എന്നാല് ഗുരുവിന്റെ ശുഭദൃഷ്ടിയോ ശക്തമായ അഞ്ചാം ഭാവമോ ഉണ്ടെങ്കില് ദോഷത്തിന്റെ തീവ്രത കുറയാന് സാധ്യതയുണ്ട്.
പിതൃദോഷം മറ്റൊരു പ്രധാന കാരണമാണ്. സൂര്യനോ ചന്ദ്രനോ രാഹു- കേതുവിനോടൊപ്പം സ്ഥിതി ചെയ്യുകയോ, ഒന്പതാം ഭാവം ഗുരുതരമായി പാപഗ്രഹങ്ങളാല് ബാധിക്കപ്പെടുകയോ ചെയ്താല് പിതൃദോഷത്തിന്റെ സൂചന ലഭിക്കുന്നു. ജ്യോതിഷപ്രകാരം ഇത് പൂര്വ്വികരുടെ അനുഗ്രഹക്കുറവിനെയോ പൂര്വ്വജന്മ കര്മ്മഫലങ്ങളെയോ സൂചിപ്പിക്കുന്നു. ഇത്തരത്തിലുള്ള ദോഷങ്ങള് സന്താനലാഭത്തില് തടസ്സങ്ങള് സൃഷ്ടിക്കുമെന്ന് ചില ഗ്രന്ഥങ്ങള് വ്യക്തമാക്കുന്നു.
ശനി-ചൊവ്വ സംയോജനം
സന്താനയോഗത്തെ ബാധിക്കുന്ന മറ്റൊരു പ്രധാന ദോഷമാണ്. ശനിയും ചൊവ്വയും ചേര്ന്ന് അഞ്ചാം ഭാവത്തെ ദൃഷ്ടിക്കുകയോ അഞ്ചാം ഭാവത്തില്തന്നെ സംയോജിക്കുകയോ ചെയ്താല് സന്താനകാര്യങ്ങളില് ഗുരുതരമായ മെഡിക്കല് വെല്ലുവിളികള് ഉണ്ടാകാം. ചില സന്ദര്ഭങ്ങളില് ചികിത്സ ആവശ്യമായ ആരോഗ്യപ്രശ്നങ്ങള്, ഗര്ഭധാരണത്തിലെ ബുദ്ധിമുട്ടുകള്, ദീര്ഘകാല സന്താനവൈകല്യം തുടങ്ങിയ ഫലങ്ങള് പ്രകടമാകാം. എന്നിരുന്നാലും ഈ ദോഷങ്ങള് ഉണ്ടായാലും ശക്തമായ ഗുരുബലം, ശുഭദൃഷ്ടികള് അനുകൂല ദശാഭുക്തികള് എന്നിവ ലഭിക്കുമ്പോള് സന്താനലാഭം സാധ്യമാകുമെന്ന് ജ്യോതിഷം വ്യക്തമാക്കുന്നു.
സന്താനലാഭത്തില് താല്ക്കാലിക തടസ്സങ്ങള് സൂചിപ്പിക്കുന്ന യോഗങ്ങള്
പലപ്പോഴും യോഗങ്ങള് സന്താനലാഭത്തില് കാലതാമസം സൃഷ്ടിക്കാറുണ്ട്. അനുയോജ്യമായ ദശാഭുക്തികളും ഗോചരഫലങ്ങളും ലഭിക്കുമ്പോള് പിന്നീട് സന്താനസൗഭാഗ്യം ലഭിക്കാനിടയുണ്ട്.
അഞ്ചാം ഭാവാധിപതി ആറ് അല്ലെങ്കില് എട്ടാം ഭാവത്തില് സ്ഥിതി ചെയ്യുകയോ വക്രഗതിയിലായിരിക്കുകയോ ചെയ്താല്, സന്താനലാഭത്തില് ആദ്യഘട്ടത്തില് ചില തടസ്സങ്ങളും വൈകല്യങ്ങളും അനുഭവപ്പെടാം. എന്നാല് ഈ സ്ഥിതികള് പലപ്പോഴും സ്ഥിരമായ നിഷേധമല്ല. സമയപരിണാമത്തില് അനുകൂലഫലങ്ങള് ലഭിക്കുകയും സന്താനയോഗം സഫലമാവുകയും ചെയ്യാം.
ശനിയുടെ ദൃഷ്ടി അഞ്ചാം ഭാവത്തിലോ അതിന്റെ അധിപതിയിലോ പതിക്കുന്നതും കാലതാമസത്തിന്റെ സൂചനയാണ്. ശനി മന്ദഗതിയുടെയും വൈകല്യത്തിന്റെയും കാരകനായതിനാല് സന്താനലാഭം വൈകിപ്പിക്കാം. എന്നാല് ശനിയെയോ അഞ്ചാം ഭാവത്തെയോ ഗുരു ദൃഷ്ടിക്കുന്നുവെങ്കില്, ദോഷത്തിന്റെ തീവ്രത കുറയുകയും സാധാരണയായി 1 മുതല് 3 വര്ഷത്തിനുള്ളില് സന്താനലാഭത്തിന് സാധ്യത തെളിയുകയും ചെയ്യും.
അതുപോലെ, ജന്മലഗ്നപ്രകാരം അഞ്ചാം ഭാവം ദുര്ബലമായാലും, ചന്ദ്രലഗ്നത്തില് അഞ്ചാം ഭാവം ശക്തമാണെങ്കില് പ്രതീക്ഷ നഷ്ടപ്പെടുത്തേണ്ടതില്ല. ചന്ദ്രലഗ്നത്തിന്റെ ശക്തി സന്താനയോഗത്തെ സംരക്ഷിക്കുകയും വിവാഹശേഷം ഏതാനും വര്ഷങ്ങള്ക്കുള്ളില് സന്താനസൗഭാഗ്യം ലഭിക്കുന്നതിന് വഴിയൊരുക്കുകയും ചെയ്യുന്നു. അതുകൊണ്ട് ജാതകത്തിലെ ഓരോ ദോഷവും സമഗ്രമായി വിലയിരുത്തിയ ശേഷമേ അന്തിമഫലനിര്ണ്ണയം നടത്താവൂ.
ദശാപഹാരകാലവും സന്താനലാഭവും
ജാതകത്തില് ശക്തമായ സന്താനയോഗങ്ങള് ഉണ്ടായിരുന്നാലും, അവ യഥാസമയം ഫലം നല്കണമെങ്കില് അനുയോജ്യമായ ദശാപഹാര(ദശാ- അന്തര്ദശാ) കാലം ലഭിക്കേണ്ടത് അനിവാര്യമാണ്. ജ്യോതിഷശാസ്ത്രപ്രകാരം ഒരു യോഗം ജാതകത്തില് നിലനില്ക്കുന്നത് മാത്രം പോരാ; ആ യോഗത്തെ പ്രവര്ത്തനക്ഷമമാക്കുന്ന ഗ്രഹങ്ങളുടെ ദശയും അന്തര്ദശയും വരുമ്പോഴാണ് അതിന്റെ ഫലം അനുഭവപ്പെടുന്നത്. അതുകൊണ്ടുതന്നെ ചില ദമ്പതികള്ക്ക് നല്ല സന്താനയോഗങ്ങള് ഉണ്ടായിട്ടും വര്ഷങ്ങളോളം കാത്തിരിക്കേണ്ട സാഹചര്യം ഉണ്ടാകാറുണ്ട്.
വിവാഹസമയത്തോ വിവാഹാനന്തര ആദ്യവര്ഷങ്ങളിലോ ആറാം, എട്ടാം, പന്ത്രണ്ടാം ഭാവങ്ങളുടെ അധിപതികളുടെ ദശാപഹാരങ്ങള് നടക്കുകയാണെങ്കില് സന്താനലാഭത്തില് കാലതാമസം നേരിടാം. ആറാം ഭാവം രോഗങ്ങളെയും ചികിത്സകളെയും എട്ടാം ഭാവം അപ്രതീക്ഷിത തടസ്സങ്ങളെയും പന്ത്രണ്ടാം ഭാവം ചെലവുകളെയും ആശുപത്രിവാസത്തെയും സൂചിപ്പിക്കുന്നു. അതിനാല് ഈ കാലഘട്ടങ്ങളില് മെഡിക്കല് പരിശോധനകള്, ചികിത്സകള്, ഗര്ഭധാരണവുമായി ബന്ധപ്പെട്ട ബുദ്ധിമുട്ടുകള്, സാമ്പത്തിക ചെലവുകള് എന്നിവ അനുഭവപ്പെടാന് സാധ്യതയുണ്ട്.
അതേസമയം ഗുരുവിന്റെ ദശാപഹാരവും അല്ലെങ്കില് അഞ്ചാം ഭാവാധിപതിയുടെ ദശാപഹാരവും ആരംഭിക്കുമ്പോള് സന്താനയോഗങ്ങള് ശക്തമായി പ്രവര്ത്തിക്കാന് തുടങ്ങും. ഗുരുപുത്രകാരകനായതിനാല് അദ്ദേഹത്തിന്റെ ദശ സാധാരണയായി സന്താനലാഭത്തിന് അനുകൂല സാഹചര്യങ്ങള് സൃഷ്ടിക്കുന്നു. അതുപോലെ അഞ്ചാം ഭാവാധിപതിയുടെ ദശയും അന്തര്ദശയും ഗര്ഭധാരണത്തിനും സന്താനജനനത്തിനും അനുയോജ്യമായ അവസരങ്ങള് നല്കുന്നു. അതിനാല് സന്താനലാഭത്തിന്റെ സമയം നിര്ണ്ണയിക്കുമ്പോള് ജാതകത്തിലെ യോഗങ്ങളോടൊപ്പം ദശാപഹാരകാലത്തിന്റെ സ്വഭാവവും നിര്ബന്ധമായും വിലയിരുത്തേണ്ടതാണ്. ഇത് സന്താനലാഭം വൈകുന്നതിന്റെ യഥാര്ത്ഥ കാരണം മനസ്സിലാക്കാന് സഹായിക്കുന്നു.
സന്താനലാഭവും ഗോചരഫലങ്ങളും
ജന്മജാതകത്തിലെ യോഗങ്ങളും ദശാപഹാരകാലങ്ങളും സന്താനലാഭത്തിനുള്ള അടിസ്ഥാനസൂചനകള് നല്കുമ്പോള്, ആ യോഗങ്ങള് എപ്പോള് ഫലപ്രദമാകുമെന്ന് നിര്ണ്ണയിക്കുന്നതില് ഗോചരഫലങ്ങള്ക്ക്(ഗ്രഹസഞ്ചാരഫലങ്ങള്) വളരെ വലിയ പ്രാധാന്യമുണ്ട്. പ്രത്യേകിച്ച് ഗുരു, ശനി, രാഹു-കേതു എന്നിവയുടെ ഗോചരങ്ങള് സന്താനകാര്യങ്ങളില് ശ്രദ്ധേയമായ മാറ്റങ്ങള് സൃഷ്ടിക്കാറുണ്ട്.
അഞ്ചാം ഭാവത്തിന് ഗുരുവിന്റെ ദൃഷ്ടി ലഭിച്ചാല് പല ദോഷങ്ങളും ശമിക്കുകയും വൈകിയാലും സന്താനലാഭം ലഭിക്കുകയും ചെയ്യും. ഗുരുഗോചരം സന്താനലാഭവുമായി ഏറ്റവും അടുത്ത ബന്ധമുള്ള ഗോചരമായി കണക്കാക്കപ്പെടുന്നു. പുത്രകാരകനായ ഗുരു ജന്മജാതകത്തിലെ അഞ്ചാം ഭാവത്തെ ദൃഷ്ടിക്കുമ്പോഴോ, അഞ്ചാം ഭാവാധിപതിയെ ദൃഷ്ടിക്കുമ്പോഴോ, ജന്മഗുരുവുമായി അനുകൂലബന്ധം സ്ഥാപിക്കുമ്പോഴോ, സന്താനയോഗങ്ങള് ശക്തമാകുന്നു. ഇത്തരത്തിലുള്ള കാലഘട്ടങ്ങളില് ഗര്ഭധാരണത്തിനും സന്താനജനനത്തിനും അനുകൂല സാഹചര്യം രൂപപ്പെടുകയും ആ വര്ഷത്തിനുള്ളില് സന്താനലാഭ സാധ്യത ഗണ്യമായി വര്ദ്ധിക്കുകയും ചെയ്യും.
ശനിഗോചരം സാധാരണയായി കാലതാമസവും പരീക്ഷണങ്ങളും നല്കുന്ന സ്വഭാവമുള്ളതാണ്. ശനിയുടെ കടുത്ത ദൃഷ്ടി അഞ്ചാം ഭാവത്തിലോ അതിന്റെ അധിപതിയിലോ പതിക്കുമ്പോള് സന്താനകാര്യങ്ങളില് വൈകല്യം അനുഭവപ്പെടാം. എന്നാല് ആ പ്രതികൂലദൃഷ്ടി മാറുന്ന സമയത്ത് തടസ്സങ്ങള് ക്രമേണ കുറയുകയും അടുത്ത 2 മുതല് 3 വര്ഷത്തിനുള്ളില് സന്താനലാഭത്തിനുള്ള സാധ്യത വര്ദ്ധിക്കുകയും ചെയ്യും.
രാഹു-കേതു ഗോചരം അഞ്ചാം ഭാവത്തെ ബാധിക്കുമ്പോള് സര്പ്പദോഷ സദൃശമായ ഫലങ്ങള് നല്കാന് സാധ്യതയുണ്ട്. എന്നാല് അഞ്ചാം ഭാവത്തില് സ്ഥിതി ചെയ്യുന്ന രാഹുവോ കേതുവോ അടുത്ത രാശിയിലേക്ക് മാറുമ്പോള് അവരുടെ പ്രതികൂല സ്വാധീനം കുറയുന്നു. ഇതോടെ ഗര്ഭധാരണത്തിലെ തടസ്സങ്ങള് ശമിക്കുകയും സന്താനലാഭത്തിനുള്ള സാധ്യതകള് മെച്ചപ്പെടുകയും ചെയ്യുന്നു. അതിനാല് സന്താനലാഭത്തിന്റെ സമയംനിര്ണ്ണയിക്കുമ്പോള് ഗോചര ഫലങ്ങളുടെ സൂക്ഷ്മപരിശോധനവളരെ പ്രധാനമാണ്.
പുത്രസ്ഫുടം
സന്താനഭാഗ്യത്തിന്റെ ശക്തിയും സന്താനലാഭത്തിനുള്ള സാധ്യതകളും സൂക്ഷ്മമായി വിലയിരുത്താന് ജ്യോതിഷത്തില് ഉപയോഗിക്കുന്ന പ്രത്യേക ഗണിതപരമായ സൂചികയാണ് പുത്രസ്ഫുടം. പുരുഷജാതകത്തില് ഗുരു(പുത്രകാരകന്), സൂര്യന്(പിതൃകാരകന്), ചൊവ്വ(വീര്യകാരകന്) എന്നീ ഗ്രഹങ്ങളുടെ രാശി, ഡിഗ്രി, കലകള് എന്നിവ കൂട്ടിച്ചേര്ത്ത് പുത്രസ്ഫുടം നിര്ണ്ണയിക്കുന്നു. സ്ത്രീജാതകത്തില് ഗുരു, ചന്ദ്രന്, ശുക്രന് എന്നീ ഗ്രഹങ്ങളുടെ ഡിഗ്രികള് കൂട്ടിച്ചേര്ത്താണ് പുത്രസ്ഫുടം കണക്കാക്കുന്നത്. ഈ സ്ഫുടം ജാതകത്തില് ഏത് ഭാവത്തില് പതിക്കുന്നു, അതിന് ലഭിക്കുന്ന ദൃഷ്ടികളും സംയോജനങ്ങളും എന്തൊക്കെയാണെന്നതിനെ ആശ്രയിച്ചാണ് സന്താനഭാഗ്യത്തിന്റെ ശക്തിയും കാലതാമസവും തടസ്സങ്ങളും നിര്ണ്ണയിക്കുന്നത്.
പുത്രസ്ഫുടത്തിന്റെ സ്ഥാനം
പുത്രസ്ഫുടം കണക്കാക്കിയശേഷം അത് ജാതകത്തിലെ ഏത് ഭാവത്തില് പതിക്കുന്നു എന്നത് സന്താനഭാഗ്യ നിര്ണ്ണയത്തില് വളരെ പ്രധാനപ്പെട്ട ഘടകമാണ്. പുത്രസ്ഫുടം ലഗ്നം(1-ാം ഭാവം), അഞ്ചാം ഭാവം, ഒന്പതാം ഭാവം, പതിനൊന്നാം ഭാവം എന്നീ ശുഭസ്ഥാനങ്ങളില് സ്ഥിതി ചെയ്യുകയും അതിന് ഗുരുവിന്റെയോ ശുക്ലപക്ഷചന്ദ്രന്റെയോ ശുഭദൃഷ്ടി ലഭിക്കുകയും ചെയ്താല് മികച്ച സന്താനയോഗം ഉണ്ടാകുമെന്ന് ജ്യോതിഷഗ്രന്ഥങ്ങള് സൂചിപ്പിക്കുന്നു. ഇത്തരത്തിലുള്ള സ്ഥാനം സന്താനലാഭം എളുപ്പമാക്കുകയും വംശവര്ദ്ധനയ്ക്ക് അനുകൂലമായ സാഹചര്യങ്ങള് സൃഷ്ടിക്കുകയും ചെയ്യുന്നു.
അതേസമയം പുത്രസ്ഫുടം, ആറാം, എട്ടാം, പന്ത്രണ്ടാം ഭാവങ്ങളില് സ്ഥിതി ചെയ്യുന്നത് അനുകൂലമല്ലെന്ന് കണക്കാക്കപ്പെടുന്നു. ഈ ഭാവങ്ങള് രോഗം, തടസ്സം, ദുരിതം, നഷ്ടം, ചെലവ് എന്നിവയുമായി ബന്ധപ്പെട്ടതിനാല് സന്താനലാഭത്തില് കാലതാമസം, ചികിത്സയുടെ ആവശ്യകത, ഗര്ഭധാരണത്തിലെ ബുദ്ധിമുട്ടുകള് തുടങ്ങിയ പ്രശ്നങ്ങള് ഉണ്ടാകാന് സാധ്യതയുണ്ട്. പ്രത്യേകിച്ച് പാപഗ്രഹങ്ങളുടെ ദൃഷ്ടിയോ സംയോജനമോ ലഭിച്ചാല് ദോഷഫലങ്ങള് കൂടുതല് ശക്തമാകാം. അതിനാല് പുത്രസ്ഫുടത്തിന്റെ സ്ഥാനം സന്താനഭാഗ്യത്തിന്റെ ഗുണനിലവാരവും ഫലപ്രാപ്തിയും വിലയിരുത്തുന്നതിനുള്ള പ്രധാന സൂചകമായി പരിഗണിക്കപ്പെടുന്നു.
അപുത്രയോഗം (സന്താന നിഷേധയോഗം)
ജ്യോതിഷശാസ്ത്രത്തില് സന്താനലാഭം പൂര്ണ്ണമായും നിഷേധിക്കപ്പെടുന്ന അവസ്ഥയെ സൂചിപ്പിക്കുന്ന ചില ഗുരുതര യോഗങ്ങളെ 'അപുത്രയോഗം' അഥവാ സന്താനനിഷേധ യോഗം എന്നുവിളിക്കുന്നു. എന്നാല് ഈ യോഗങ്ങള് വളരെ അപൂര്വ്വമായാണ് കാണപ്പെടുന്നത്. ഒരു യോഗം മാത്രം കണ്ടുകൊണ്ട് സന്താനനിഷേധം വിധിക്കാതെ മുഴുവന് ജാതകവും സമഗ്രമായി പരിശോധിക്കേണ്ടതാണ്.
അപുത്രയോഗത്തിന്റെ പ്രധാന സൂചനകളില് അഞ്ചാം ഭാവാധിപതി ആറാം, എട്ടാം, പന്ത്രണ്ടാം ഭാവങ്ങളില് നീചസ്ഥിതിയില് ഇരിക്കുന്നത്, അഞ്ചാം ഭാവം പാപകര്ത്തരി യോഗത്തില് അകപ്പെടുന്നത്, കൂടാതെ അഞ്ചാം ഭാവവും ഒന്പതാം ഭാവവും ഒരേസമയം പാപഗ്രഹങ്ങളാല് ശക്തമായി ബാധിക്കപ്പെടുന്നത് എന്നിവ ഉള്പ്പെടുന്നു. സന്താനകാര്യങ്ങളുടെ കാരകനായ ഗുരുവും ഗുരുതരമായി ദോഷബാധിതനായാല് ദോഷത്തിന്റെ തീവ്രത വര്ദ്ധിക്കുന്നു.
ചില പ്രത്യേക ഗ്രഹസംയോജനങ്ങള് കൂടുതല് ശ്രദ്ധേയമാണ്. രാഹു, ശനി, അഞ്ചാം ഭാവാധിപതി എന്നിവയുടെ സംയോജനം ഉണ്ടായാല് വന്ധ്യതയോ ബീജോല്പ്പാദനവുമായി ബന്ധപ്പെട്ട ഗുരുതര പ്രശ്നങ്ങളോ ഉണ്ടാകാം. ചൊവ്വയും കേതുവും സംയോജിക്കുമ്പോള് പ്രത്യേകിച്ച് സ്ത്രീജാതകത്തില്, ഗര്ഭാശയ സംബന്ധമായ ഗുരുതര ആരോഗ്യപ്രശ്നങ്ങള്ക്ക് സാധ്യത കാണുന്നു.
ജ്യോതിഷത്തിലെ പ്രധാന ഒഴിവാക്കല് നിയമം
ജ്യോതിഷപരമായി ഒരാളുടെ ജാതകത്തില് ശക്തമായ പുത്രദോഷമോ സന്താനതടസ്സയോഗങ്ങളോ കാണപ്പെട്ടാലും, അതുകൊണ്ടുമാത്രം സന്താനനിഷേധം ഉറപ്പിക്കാനാവില്ല. ജീവിതപങ്കാളിയുടെ ജാതകത്തില് അഞ്ചാം ഭാവം ശക്തമായിരിക്കുകയോ, ഗുരു ഉന്നതബലത്തോടെ നിലകൊള്ളുകയോ, മികച്ച സന്താനയോഗങ്ങള് ഉണ്ടായിരിക്കുകയോ ചെയ്താല് ദമ്പതികള്ക്ക് സന്താനലാഭസാധ്യത നിലനില്ക്കും.
ഉപസംഹാരം
സന്താനഭാഗ്യം എന്നത് ജ്യോതിഷശാസ്ത്രത്തിലെ ഏറ്റവും സൂക്ഷ്മവും ഗൗരവമേറിയതുമായ വിഷയങ്ങളിലൊന്നാണ്. അഞ്ചാം ഭാവം മാത്രം അടിസ്ഥാനമാക്കി സന്താനലാഭത്തെക്കുറിച്ച് നിഗമനത്തിലെത്തുന്നത് ശരിയായ രീതിയല്ല. അഞ്ചാം ഭാവത്തിന്റെയും അതിന്റെ അധിപതിയുടെയും ബലം, പുത്രകാരകനായ ഗുരുവിന്റെ സ്ഥാനം, ഒന്പതാം ഭാവത്തിന്റെ ശക്തി, ലഗ്നവും, ഏഴാം ഭാവവും, ദശാപഹാരകാലങ്ങള്, ഗ്രഹഗോചരങ്ങള്, പുത്രസ്ഫുടത്തിന്റെ സ്ഥാനം എന്നിവയെല്ലാം സമഗ്രമായി പരിശോധിക്കേണ്ടതാണ്. അതോടൊപ്പം ജീവിതപങ്കാളിയുടെ ജാതകത്തിലുള്ള സന്താനയോഗങ്ങളും നിര്ണ്ണായക പങ്കു വഹിക്കുന്നു.
ബ്രഹ്മശ്രീ പാടൂര് സുബ്രഹ്മണ്യശാസ്ത്രികള്
(8943340423)