ക്ഷേത്രത്തിൽ ചന്ദനത്തിനൊപ്പം നൽകുന്ന പൂവ് ചെവിയിൽ വെക്കാനോ അതോ തലയിൽ വെക്കാനോ?
ക്ഷേത്രദർശനത്തിനിടെ ഭക്തർക്ക് ചന്ദനത്തിനൊപ്പം ഒരു പൂവും നൽകുന്ന പതിവ് പല ക്ഷേത്രങ്ങളിലും കാണാം. എന്നാൽ ഈ ആചാരത്തിന് പിന്നിലെ ആത്മീയമായ അർഥം എന്താണെന്ന് പലർക്കും അറിയില്ല. ക്ഷേത്രത്തിന്റെ ആചാരങ്ങളും പ്രതിഷ്ഠാ സങ്കൽപ്പവും അനുസരിച്ച് അരളി, മുല്ല, റോസ്, തെറ്റിപ്പൂവ് തുടങ്ങിയ വിവിധ പൂക്കളാണ് പ്രസാദമായി നൽകുന്നത്.
സാധാരണയായി ദേവന്റെ സന്നിധിയിൽ പൂജ നടത്തി സമർപ്പിച്ച പൂവാണ് ചന്ദനത്തിനൊപ്പം ഭക്തർക്ക് നൽകുന്നത്. ഇത്തരത്തിൽ ലഭിക്കുന്ന പൂവ് ദൈവാനുഗ്രഹത്തിന്റെ പ്രതീകമാണെന്നാണ് വിശ്വാസം. വിഗ്രഹത്തിൽ അർപ്പിച്ച പൂവിൽ ദൈവിക ചൈതന്യം നിറഞ്ഞിരിക്കുന്നുവെന്നും അത് ഭക്തർക്കു ഐശ്വര്യവും അനുഗ്രഹവും പകരുമെന്നുമാണ് വിശ്വാസികൾ കരുതുന്നത്.
സ്ത്രീകൾ പ്രസാദമായി ലഭിക്കുന്ന പൂവ് തലമുടിയിൽ ചൂടുകയും പുരുഷന്മാർ ചെവിയിൽ വയ്ക്കുകയും ചെയ്യുന്നത് പതിവാണ്. പൂവിന്റെ സുഗന്ധം മനസ്സിന് ശാന്തിയും ആത്മീയമായ ഉണർവും നൽകുമെന്നാണ് വിശ്വാസം. കൂടാതെ ചന്ദനത്തിന്റെ തണുപ്പ് കൂടുതൽ നേരം നിലനിർത്താനും പൂവ് സഹായിക്കുമെന്നാണ് പറയപ്പെടുന്നത്.
ക്ഷേത്രത്തിൽ നിന്ന് ചന്ദനവും പൂവും സ്വീകരിക്കുന്നത് ദർശനം പൂർത്തിയായതിന്റെ അടയാളമായും കണക്കാക്കപ്പെടുന്നു. വിഷ്ണുക്ഷേത്രങ്ങളിൽ പ്രസാദമായി ലഭിക്കുന്ന തുളസിയിലയ്ക്ക് പ്രത്യേക പ്രാധാന്യമുണ്ട്. വിഷ്ണുഭഗവാന്റെ പ്രിയപ്പെട്ട ഇലയായതിനാൽ തുളസി ലഭിക്കുന്നത് മംഗളകരമായ സൂചനയായി ഭക്തർ വിശ്വസിക്കുന്നു.
പ്രസാദമായി ലഭിക്കുന്ന പൂക്കൾ ഭക്തിപൂർവം തലയിൽ ചൂടുകയോ വീട്ടിലെ പൂജാമുറിയിൽ സൂക്ഷിക്കുകയോ ചെയ്യാം. പിന്നീട് പൂവ് വാടിയാൽ ആദരവോടെ നദിയിലോ വൃക്ഷച്ചുവട്ടിലോ സമർപ്പിക്കുന്നതാണ് ഉചിതമായ ആചാരമായി കണക്കാക്കപ്പെടുന്നത്.