ക്ഷേത്രദർശനത്തിനിടെ പൂജാരിയിൽ നിന്ന് പ്രസാദമായി ലഭിക്കുന്ന ചന്ദനം എന്തു ചെയ്യും?
ഹിന്ദു ആചാരങ്ങളിൽ കുറി ധരിക്കുന്നതിന് പ്രത്യേക സ്ഥാനമുണ്ട്. പഴയകാലത്ത് ദൈനംദിന ജീവിതത്തിന്റെ ഭാഗമായിരുന്ന കുറി ഇന്ന് പലരും ക്ഷേത്രദർശന വേളകളിലോ വിശേഷദിവസങ്ങളിലോ മാത്രമാണ് ധരിക്കുന്നത്. ഭസ്മം, ചന്ദനം, കുങ്കുമം എന്നിവയാണ് സാധാരണയായി ഉപയോഗിക്കുന്ന കുറികൾ.
ആചാരവിശ്വാസങ്ങൾ പ്രകാരം ബ്രാഹ്മമുഹൂർത്തത്തിൽ ചന്ദനവും പുലർച്ചെ കുങ്കുമവും സായാഹ്നത്തിൽ ഭസ്മവും ധരിക്കുന്നത് ശരീരത്തിനും മനസ്സിനും ഗുണകരമാണെന്ന് കരുതപ്പെടുന്നു. നാഡീശുദ്ധിക്കും രോഗപ്രതിരോധത്തിനും ഇത് സഹായിക്കുമെന്നാണ് വിശ്വാസം.
നെറ്റി, കഴുത്ത്, തോളുകൾ, നെഞ്ച്, കണങ്കാൽ എന്നിവ ഉൾപ്പെടെ ശരീരത്തിലെ 12 സ്ഥാനങ്ങളിൽ ഭസ്മമോ ചന്ദനമോ കുങ്കുമമോ ചാർത്തുന്നത് ഉത്തമമാണെന്നാണ് ആചാരഗ്രന്ഥങ്ങൾ പറയുന്നത്. ഇവയിൽ ഏറ്റവും പ്രധാനപ്പെട്ട സ്ഥാനം നെറ്റിക്കാണ്. കുളിച്ച് ശുദ്ധമായ ശേഷം വലതുകൈയിലെ മോതിരവിരൽ ഉപയോഗിച്ച് കുറി ധരിക്കണമെന്നാണ് ആചാരം. നെറ്റിയുടെ ഇടതുവശത്ത് നിന്ന് കുറിയിടാൻ ആരംഭിക്കണമെന്നും വിശ്വാസമുണ്ട്. ചന്ദനം ധരിക്കുന്നത് മനസ്സിനും ശരീരത്തിനും ശാന്തി നൽകുമെന്നാണ് പറയപ്പെടുന്നത്.
ഭസ്മം ധരിക്കുന്നതിനും പ്രത്യേക രീതികളുണ്ട്. രാവിലെ ജലം ചേർത്ത് കുഴച്ച ഭസ്മവും ഉച്ചയ്ക്ക് ചന്ദനം ചേർത്ത ഭസ്മവും ഉപയോഗിക്കാമെന്നാണ് വിശ്വാസം. എന്നാൽ സായാഹ്നത്തിൽ ഉണങ്ങിയ ഭസ്മം മാത്രമേ ധരിക്കാവൂ എന്നും സ്ത്രീകൾ ഉണങ്ങിയ ഭസ്മം മാത്രമേ കുറിയായി ഉപയോഗിക്കാവൂ എന്നും ചില ആചാരങ്ങളിൽ പറയുന്നുണ്ട്.
ക്ഷേത്രദർശനത്തിനിടെ പൂജാരിയിൽ നിന്ന് പ്രസാദമായി ലഭിക്കുന്ന ചന്ദനം, ഭസ്മം, കുങ്കുമം എന്നിവ അതത് ക്ഷേത്രത്തിലെ പ്രതിഷ്ഠയുടെ സ്വഭാവമനുസരിച്ചാണ് നൽകുന്നത്. ഇത്തരം പ്രസാദങ്ങൾ ക്ഷേത്രത്തിൽ നിന്ന് പുറത്തിറങ്ങിയ ശേഷമാണ് ധരിക്കേണ്ടതെന്നാണ് പൊതുവായ വിശ്വാസം. കുറി ധരിക്കുന്ന വേളയിൽ മനസ്സും വാക്കും ഭഗവാന്റെ നാമസ്മരണയിൽ കേന്ദ്രീകരിക്കണമെന്നും ആചാരങ്ങൾ നിർദേശിക്കുന്നു.